مطلوب عروسة طيبة..
ومتعلمة ومؤدبة..
ومؤمنة بالقضاء والقدر..
سنها من سني..
أصغر أو أكبر مني..
مش هنختلف..
وتكون بتحب القراءة..
وتهوي الرحلات..
وتعشق السفر..
مش عضو ف أي حزب..
وطبعاً عارفة إن الكذب حرام..
بتحب الكورة..
مهمومة بالدوري العام..
وملفوفة القوام..
حلوة وزي القمر..
شعرها ناعم حرير..
ملهاش أي مصلحة..
ف شارع القصر العيني..
أو مجمع التحرير..
وفاهمة كويس ميدان الجيزة..
مش متابعة جلسات مجلس الشعب..
ولا بتسمع البيان الختامي..
لأي مؤتمر..
وتكون من عيلة..
بتشتري راجل..
لا عايزة شبكة ولا مهر..
وأنا بقي..
خبرة ف المرمطة..
وجميع أشكال القهر..
مواطن من إنتاج مناهج..
وزارة التربية والتعليم..
ثانوية عامة..
النظام القديم..
أيام الأرنب الغضبان..
والخس والجزر..
وزي النسمة والله..
يعني تعتبرني من دلوقتي
مش موجود..
لا حس ولا خبر..
بس مخي نضيف..
وعاقل ورزين..
وعندي شوية نظر..
ورغم إني ياما إتزحلقت..
لكن لسه بفرح بالمطر..
علي فكرة..
أنا حاجز شقة بحري..
أربعين متر..
آخر طريق الواحات..
بس لسه ماحطوش الأساس..
عشان تقريباً..
مش لاقيين الحجر..
_________________
تحياتي:
العقول الكبيرة تبحث عن الأفكار..
والعقول المتفتحة تناقش الأحداث..
والعقول الصغيرة تتطفل على شؤون الناس..
مدونة /http://walisala7.wordpress.com/
اليوم في 11:36 من طرف رضا البطاوى
